غادي تخيطي قفطان ولا جلابة؟ 4 حوايج قبل ما يفصّل الخياط الثوب
شحال من ميترو تشري، الثمن و نهار التسليم، الطالون نهار القياس، و التجربة قبل السفيفة و العقاد: 4 حوايج كتفاداك المفاجآت عند الخياط.
فريق تحرير Caftanio ·
آخر تحديث:
غادي تخيطي قفطان ولا جلابة؟ أغلب المشاكل اللي كتوقع عند الخياط كتبدا قبل ما يفصّل الثوب: ثوب ما كافيش، ثمن ما متفقينش عليه، طول غالط ولا تعديل جا معطل.
فهاد الفيديو جمعنا 4 حوايج خاصك تديريهم من الأول. و تحت غادي تلقاي الشرح ديال كل وحدة و علاش كتفرق.
1. سولي الخياط شحال من ميترو قبل ما تشري الثوب
ما تشريش الثوب على حساب التقدير ديالك ولا ديال البائع. سولي الخياط أولا شحال من ميترو كيحتاج للموديل اللي باغية.
علاش؟ حيت العرض ديال الثوب كيبدل الحساب. نفس القفطان يقدر يحتاج ميترات أكثر إلا كان الثوب ضيق، و أقل إلا كان عريض. و الكمام الواسعين، الطول و الطبقات ديال التكشيطة كيزيدو حتى هوما.
ملي تمشي تشري الثوب، كتبي العرض اللي قالك الخياط، و قارني مع العرض ديال الثوب اللي عجبك. و إلا كان عندك شك، خدي عينة صغيرة ولا تصويرة ديال الإتيكيت للخياط قبل ما تشري الكمية كاملة.
2. تافقي على الثمن و نهار التسليم من الأول
قبل ما يبدا الخياط، تافقي على الثمن و على نهار التسليم. الثمن خاصو يكون واضح: الخدمة، السفيفة، العقاد، الطرز إلا كان، و أي حاجة أخرى. و كتبيه فميساج باش يبقى عندكم بجوج.
و فموسم الأعراس، عطيه الثوب شهرين قبل. فهاد الوقت الخياطين كيكونو عامرين بالخدمة، و القفطان اللي فيه السفيفة و العقاد و خدمة اليد كياخد الوقت. الشهرين كيعطيوك الوقت للتجربة و لأي تعديل بلا ضغط.
إلا كنتي باقا محتارة بين الخياطة و الشرا، شوفي نشري قفطان ولا نخيطو؟.
3. نهار القياس، جيبي الطالون اللي غادي تلبسي
نهار ما ياخد الخياط القياسات، جيبي الطالون اللي غادي تلبسي نهار المناسبة. الطول كيتحسب بيه.
إلا خديتي القياس بالحفا ولا بصباط عادي، و نهار العرس لبستي طالون بكعب، القفطان غادي يجي قصير. و العكس، إلا خديتيه بكعب عالي و لبستي طالون واطي، غادي تبقاي كتعفسي عليه.
و إلا كانت جلابة ديال كل نهار، جيبي الصباط اللي غادي تلبسي معاها عادة.
4. جربيه قبل ما يدير السفيفة و العقاد
هادي أهم نصيحة: جربيه عند الخياط قبل ما يدير السفيفة و العقاد.
علاش؟ حيت السفيفة و العقاد خدمة اليد كتجي فالأخير، و كتتخدم على الحواش و الصدر. من بعدهم، أي تبديل خاصو يفتق خدمة اليد: إلا بغيتي تضيقي الصدر ولا تطولي الكم، الخياط خاصو يحيد السفيفة و يعاودها، و هادشي كياخد الوقت و يقدر يخسر الخدمة.
فالتجربة، تحركي: جلسي، هزي يديك، تمشاي. شوفي الكتاف، الصدر و الطول بالطالون. و قولي أي ملاحظة دابا، ماشي من بعد.
باش تفهمي شنو هي السفيفة و العقاد بالضبط، قراي السفيفة، العقاد، الراندة… شنو هوما؟.
نتي شنو كتفضلي: تخيطي ولا تشري واجد؟
الخياطة كتعطيك قفطان على قدك، ولكن كتحتاج الوقت و التنظيم. و الشرا ساهل و سريع، ولكن المقاس ماشي ديما ديالك.
إلا بغيتي تشوفي الموديلات قبل ما تقرري، قلبي فالقفاطن و الجلالب ديال المحلات: حتى إلا غادي تخيطي، غادي تعاونك تختاري الشكل اللي باغية و تبينيه للخياط.
شنو كيتقال فالفيديو
- غادي تخيطي قفطان ولا جلابة؟ 4 حوايج قبل ما يفصّل الثوب.
- سولي الخياط شحال من ميترو قبل ما تشري الثوب: العرض ديالو كيبدل الحساب.
- تافقي على الثمن و نهار التسليم من الأول، و فموسم الأعراس عطيه الثوب شهرين قبل.
- نهار القياس، جيبي الطالون اللي غادي تلبسي: الطول كيتحسب بيه.
- و جربيه عند الخياط قبل ما يدير السفيفة و العقاد: من بعدهم، أي تبديل خاصو يفتق خدمة اليد.
- الموديلات و المحلات تلقايهم فكافتانيوم.
- نتي شنو كتفضلي: تخيطي ولا تشري واجد؟
